أربع قصايد غطسوا جوه البحر


محمد عبد القوى حسن

اربع قصايد من بين جدار الذاكره

سقطوا فى بحر اليوسفى كده صدفه

لقوه مالح على اﻻخر

سابوه ونطوا فوق شجره عاليه

لبرتقان مدهون

هزوا الفروع

نزل الثمار ع اﻻرض

وقعوا لقوه

زى اللمون المخوخ من زمان

عصروه

مانزلش منه غير العلقم الصبار

شربوه كتير .. عم المدار بتتار

ركبوا الحمير المخططه ع الموج

قام هدوا حيط المبتلى فالفوج

ماسمعش منهم اوامر

طالعه ف الكتلوج

وخضره الشريفه

من زمان مشتاقه

يقع الزناتى ف كومة اﻻباليس

وابو زيد ركب الفرس

طلع الفرس متلجم

قام نط ابو القمصان ف قلب الحلبه

اخد الشال بتاع غانم

قال لو سمحتى ياهانم جنابك

سرحى اﻻوﻻد

الليل رماد متنى ف عب الكون

واﻻدهم طلع وسط الغيطان

بيوزع الغله

والجرن مش ﻻحق وﻻ مﻻحق

على المخاليق

انا خدت ابويا من ايديه

ورجعنا مالقيناش

صبح اﻻمل بشوش كما امبارح

ف الليل تقوم ناعسه

هيه ونعيمه ويرهنوا الحلقان

وحسن رقبته تطير

ف نفس البحر يوسفى

فالشرف يتهان

وانا من زمان شايف شفيقه

بتطلع لمتولى ف عز الضهر

ماتصادفوش

صابره وشتيﻻ يتحزموا بمقرن ليف

بمقرن قهر

ركبنى فوق مهرى

اعود بالمهر

واخطى

عصر انكماش الحظ

اعود بالطهر وبخطى

انقرش الحيطان

مرعوشه ليه السكه

متكومه اﻻباليس

على اخر الحاره

مليون اماره والحدق يفهمش

وﻻ فيش جساره تخش ليل اﻻنس

كل الحياره حظهم بقى جبس

والخلق توهه

ف مولد سيدى على الجمال

ف البهنسا

طالعه الصبايا صفوف

شايلين على روسهم

سبتان مع مقاطف

بيمروا من تحت الشجر

من تانى زى زمان

ﻻ المانجه سقطت

وﻻ اتمرجح الرمان

وشربت شاى الخدمه ف الميرى

من تانى وانا سهران

وانا هربان من الذاكره

شافونى اربع عساكر

ع الحدود افرنج

متخفى ف توب راجل

عمال يدور بنت تايهه

ف مولد زحمه مالوش عنوان

الرمل ساح ع الجدود

دجله وفرات واخدود

والعالم الموعود

مش ﻻقى اللضى يلضيه

وانا مش هابيع خلخالك المتصدى

انا نازل اعجن طحين الهو ياعبله

فابقى اللحقينى باربع كاسات من دمى

يمكن يجود الزمان

من صندلين الهم

طالعه الوفود براياتهم السوده

نازله الوفود والليله موعوده

طالعه الوفود براياتهم الحمره

نازله الوفود فى ساحة الهتره

كل الوفود ياثمود

متبحتره منى

وﻻ عاد وجود

يعقوب رحل يبحث عن القمصان

والديب نجيب

اتجن جاد بالكى على الخرفان

الفين صﻻه . بيعادلوا ميت تسبيحه

والبلطجيه بيسجنوا السريحه

ف شارع المعز اتنصبت المندبه

والفﻻحات عاجنين طحين السهو

اقرى القصيده تانى من اﻻول

مات النخاع الشعر من عبنول

اقرا القصيده تانى اقراها

يمكن تغوص ف البحر من معناها

وتجود نجيب سرور او عمنا بيرم

احمد فؤاد او نجم فوق السطح

عدى الوابور ع الخلق ماسمعوش

داس الوابور ع الخلق ماحسوش

دعك الوابور الكون وﻻزعقش

ارهنى تانى هاغير العنوان

ادهنى تانى يمكن انا ما انفعش

اعياد كتير طالعه ومابترجعش

شنبات كتير طويله بس ماتخوفش

مابترعبشة

عبينى ف شوالين

وارمينى جوه البحر

يمكن اﻻقى القصايد

طالعه مابتصرخش

على شجرة البرتقان

يطلع لمون نشفان

من بين جدار الذاكرة

من تانى وﻻ ينزلش


    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *